- अर्थ सरोकार सम्बाददाता
काठमाडौँ । एशियन लाइफ इन्स्योरेन्स । घरी संचालकको विषयमा विवाद त घरी, कम्पनीभित्र घटेका काण्डले बदनाम । जनताका अगाडी पटक पटक नांगिएको एशियन लाइफ इन्स्योरेन्सले पुन: एक पटक जनता झुक्याउने दुष्प्रयास गरेको खुलासा भएको छ ।
कम्पनीले चालु आर्थिक वर्षको तेश्रो त्रैमासको वित्तीय विवरण निस्काशन गर्दा प्रतिसेयर आम्दानी गलत देखाएपछि कम्पनीका सीएफओ र अन्य व्यवस्थापनको कार्यक्षमतामाथि गम्भीर प्रश्न उठेको हो । -प्रकाशित विवरणमा कम्पनीले कम्पनीको प्रतिशेयर आम्दानी १३ रुपैयाँ ८७ पैसा देखायो जुन सरासर गलत थियो ।
कम्पनीको चुक्ता पुँजी २ अर्ब १ करोड रहेकोमा कम्पनीको प्रकाशित खुद मुनाफा १३ करोड ७ लाख रहेको तथ्यलाई आधार मानेर गणना गर्दा कम्पनीको ९ महिनाको प्रतिशेयर आम्दानी जम्मा ६ रुपैयाँ ५० पैसा हुन्छ भने वार्षिक प्रतिशेयर आम्दानी ८ रुपैयाँ ६७ पैसा मात्र हुन्छ । तर कम्पनीले हुँदै नभएको प्रति सेयर आम्दानी देखाएर जनता झुक्याउने प्रयास गर्यो ।
सेयरधनी पनि ‘लाटा’ कहाँ छन् र ? हिसाब मिलेन भन्दै कम्पनीको व्यापक विरोध भएपछि बाध्य भएर र आफ्नो असक्षमतामाथि लाचारी प्रकट गर्दै ‘लाजै पचाएर’ कम्पनी भुलसुधार गर्न बाध्य भयो।
