- अर्थ सरोकार प्रदेश ५ ब्युरो
कपिलवस्तु । कपिलवस्तुमा कोरोना संक्रमण भएका बैंकका मेनेजर अझै निको नभएको खबर छ । उनी अझै पनि आइसोलेसनमा नै रहेको उनी निकट बैंकरहरुले बताएका छन् । राप्ति स्वास्थ्य विज्ञान प्रतिष्ठान दाङमा गरिएको नमुना परिक्षणमा तौलिहवामा रहेको राष्ट्रिय वाणिज्य बैंकका मेनेजरलाई कोरोना संक्रमण देखिएको थियो ।
उनमा संक्रमण पुष्टी भएपछि बैंक पुगेका सेवाग्राहीको पनि कन्टयाक्ट ट्रेसिङ थालिएको थियो । जसका क्रममा भेटिएका अन्य बैंकर र बैंक पुगेका ग्राहकहरुमा कोरोनाको परिक्षण गरिएको थियो । सबैको परिक्षण नेगेटिभ आएको छ । कपिलवस्तु नगरपालिकाका स्वास्थ्य शाखा प्रमुख उमेश गुप्ताका अनुसार राष्ट्रिय वाणिज्य बैंक तौलिहवाका शाखा प्रमुखलाई कोरोना संक्रमण देखिएपछि अन्य स्टाफ र बैंक पुगेका ग्राहककोसमेत परिक्षण गरिएको थियो । अन्यको रिपोर्ट नेगेटिभ आएको छ ।
यता बैंकले भने शाखाको कामकारवाही खोल्ने हतारो गरेको छ । ‘स्टाफहरुको रिपोर्ट नेगेटिभ आएको छ, अब आजभोलिमा शाखा खोल्छौं ।’ एक कर्मचारीले अर्थ सरोकारसँग भने ।
