">
- अर्थ सरोकार सम्बाददाता
काठमाडौँ । लोकसेवामा ‘दायाँ-बायाँ’ हुन्छ, घुस खुवाएर नाम निकाल्न सकिन्छ भन्ने चर्चाहरु त चलेकै हुन् । तर छोरीको उत्तरपुस्तिकामा आफैंले लेखेर छोरीलाई टप गराइन्छ भन्ने सुन्दा जो कोहिलाई अचम्म लाग्न सक्छ । तर भयो यस्तै । लोक सेवा आयोग सुरक्षा निकाय तथा संगठित महाशाखाको नतिजा तयारी शाखाका अधिकृत मिमबहादुर शाहीले आफ्नी छोरीलाई लोकसेवा परीक्षामा पास गराउन आफैं उत्तरपुस्तिकामा लेखिदिएको रहस्य खुलेको छ । ११ जेठ २०७६ मा नेपाल वायु सेवा निगमको सहायक चौथो तह (खरिदार सरह) को परीक्षामा सहभागी आफ्नी छोरीको उत्तरपुस्तिकामा लेखेर बदमासी गरे । विधि विज्ञान प्रयोगशालाले पनि उत्तरपुस्तिका सच्याएको प्रमाणित गरिसकेको आयोगले जनाएको छ ।
यस्तो रहेछ चोर-टेक्निक !अधिकृत शाहीले बस्तुगत परीक्षाको उत्तर पुस्तिकामा सबै ५० वटै प्रश्नका उत्तर ‘क्यापिटल’ नभई ‘स्मल’ ‘सी’ मात्र लेखेर बाहिरिन भनेका थिए । बुवाको निर्देशन अनुसार उनकी छोरीले पनि त्यसै गरेकी थिइन् । उत्तरपुस्तिका जाँच्ने क्रममा शाहीले पछि ‘सी’ लाई ‘ए’, ‘बी’ र ‘डी’ पनि बनाएर सच्याउँदै ५० वटा प्रश्नमा ५० वटैको सही उत्तर मिलाईदिएका थिए । अन्तत : सबै उत्तर मिलेपछि उनकि छोरीले सो विषयमा टप गरिन् ! उनको प्राप्ताङ्क अस्वाभाविक लागेपछि आयोगले छानबिन समिति बनाएर पुनः चेक गर्दा यस्तो रहस्य पत्ता लागेको थियो ।
तर यस्तो खुरापाती काम गर्नेलाई पनि कडा कारवाही गर्ने कानुन भने छैन । उनलाई हाल दरखास्त व्यवस्थापन केन्द्रमा पठाइएको पाइएको छ भने उनको पाँच वर्षसम्म बढुवा र ग्रेड वृद्धि रोक्का गर्ने तयारी छ । उनकी छोरीको भने उत्तर पुस्तिका भने रद्द गरिएको छ ।
