- अर्थ सरोकार सम्बाददाता
काठमाडौं । सरकारी स्वामित्वका दुई बीमा कम्पनीलाई कारवाही गर्न माग गर्दै महालेखापरिक्षकको कार्यालयले अर्थ मन्त्रालयलाई पत्र पठाएको छ । राष्ट्रिय बिमा कम्पनी र राष्ट्रिय बिमा संस्थानले समयमा लेखापरिक्षण नगरेको भन्दै कार्यालयले कारवाहीका लागि अर्थ मन्त्रालयमा पत्र पठाएको हो ।
महालेखाले समयमै लेखापरिक्षण गराउन निर्देशन दिंदा पनि उक्त बीमा कम्पनीहरुले वेवास्ता गरेको जनाएको छ । महालेखाको ५७औं बार्षिक प्रतिवेदनमा ‘समयमै लेखपरिक्षण गराउन निर्देशन दिंदासमेत राष्ट्रिय बीमा संस्थानले आव २०६९/०७० देखि र राष्ट्रिय बिमा कम्पनीले २०७३/०७४ देखि लेखपरिक्षण गराएका छैनन्।’ उल्लेख गरिएको छ । यस्तै ‘लेखापरिक्षण नगराउने संस्थाका जिम्मेवार पदाधिकारीहरुलाई लेखपरिक्षण ऐन, २०७५ को दफा २५ बमोजिम आवश्यक कारवाही गर्न सम्बन्धित मन्त्रालयका सचिवलाई लेखी पठाइएको छ’ प्रतिवेदनमा जनाइएको छ ।
यस्तो अवस्थामा बीमा समितिसमेत जिम्मेवार रहेको भन्दै लेखपरिक्षणमा पनि अनुगमन गर्नुपर्ने महालेखाको भनाइ छ ।
