• अर्थ सरोकार सम्बाददाता 

जाजरकोट । जाजरकोटमा रहेको सिटिजन्स बैंक इन्टरनेशनल लिमिटेडमा सधैंजसो ग्राहकहरुको अव्यवस्थित भीड देखिन्छ । कोरोनाको त्रासमा पूरै जाजरकोट त्राहिमाम बनेका बेला ‘सिटिजन्स बैंकमा कोरोना लाग्दैन’ भन्ने शैलीमा बैंकले उच्च लापरवाही गरेको देखिन्छ । बैंक यतिसम्म अव्यावाषित छ कि, न बैंकमा भित्र बस्न मिल्ने ठाउँ छ, न बाहिर । न सबैलाई व्यवस्थापन गर्न सक्ने सुरक्षा गार्ड, न भित्र छिटो र चुरुस्त काम गर्न सक्ने कर्मचारी। र कोरोनाको जोखिम मोलेर यसरी नै अव्यवस्थित सेवा दिइरहेको छ सिटिजन्स बैंक इन्टरनेशनल लिमिटेडले ।

जनताको विद्रोह कसले सुन्ने ?

यसो त यस्तो व्यवस्थापनहीनताले कोरोनाको जोखिम बढाएको भन्दै स्थानीयले विरोध नगरेका पनि होइनन् । तर केहि बुझेका स्थानीयले विरोध गर्दा बैंकमा ग्राहकहरुकै पनि लापरवाहीलाई पनि नकार्न भने सकिन्न । ‘मेरो काम छिटो हुनुपर्छ’ भन्ने अडानमा रहेका ग्राहकहरु पनि कोरोनाको जोखिममा संवेदनशील बन्न सकेका छैनन् । बैंकमा व्यवस्थापन यतिसम्म कमजोर छ कि, बलियाले पालो मिच्दा, निमुखाहरु कुरेर बस्छन् । बैंकमा सार्है ढिलो काम गर्ने कर्मचारी राखेर बैंकले आफ्नो कमजोरी छताछुल्ल पारेको ग्राहकहरुको गुनासो छ । ‘नामको पछाडी पनि इन्टरनेशनल रहेछ, हाम्रो ठाउँलाई पनि इटाली बनाउने भए…’ आक्रोशित हुँदै एक ग्राहक भन्छन्, ‘न बैंकले ख्याल गरेको छ न स्थानीय निकायले । यहींबाट कोरोना सर्यो भने जिम्मेवार को हुन्छ ?’ 

स्थानीय निकाय किन मौन ?

यता सिटिजन्स बैंकका बारेमा मौखिक उजुरी वडाध्यक्षसम्म पुगेपनि लिखित उजुरी नपरेको र लिखित उजुरी नपरेकाले वडाले बैंकलाई कारवाहीको कुनै प्रक्रिया सुरु गर्न नसकेको वडाका अधिकारीहरुको भनाइ छ । ‘हामीले पटक पटक मौखिक सुझाव दिइसकेका छौं । तर सिटिजन्स बैंकले हामीले भनेको मानिरहेको छैन । यस्तै अटेर गरिरहेको खण्डमा हामी कठोर निर्णय लिनसमेत पछी पर्ने स्थिति हुँदैन ।’ वडाका एक अधिकारीले भने, ‘बैंक पनि जिम्मेवार बन्नुपर्छ, ग्राहक पनि जिम्मेवार बन्नुपर्छ । सबै मिलेर कोरोना विरुद्ध लड्नुपर्छ। ‘