- अर्थ सरोकार सम्बाददाता
काठमाडौं । कृषि विकास बैंक केन्द्रिय कार्यालय तथा शाखा कार्यालय न्यूरोड काठमाडौंबाट बैंकको वित्तीय प्रणालीमा अनाधिकृत पहुँच राखेर भुक्तानी लिई फरार रहेका एक अभियुक्त पक्राउ परेका छन् । महानगरीय अपराध महाशाखा टोलीले धादिङ रुबिभ्याली गाउँपालिका-१ का ५४ वर्षीय खम्ब घलेलाई स्वयम्भूबाट पक्राउ गरेको हो ।
पक्राउ परेका व्यक्तिलाई संगठित अपराधसमेतको कसूरमा कारबाहीका लागि काठमाडौं जिल्ला अदालतमा पठाइएको छ। अपराधिक समूहका व्यक्तिहरूले संगठितरूपमा विभिन्न व्यक्तिहरूको खातामा रकम रकमान्तर गरी भुक्तानी लिएका थिए ।
२०७६ असोज ७ गते बैंकको मौज्दातबाट विभिन्न अपराधिक व्यक्तिहरूको समूहले बैंकको वित्तीय प्रणालीमा अनाधिकृत पहुँच राखेर चार करोड ८८ लाख ४६ हजार रूपैयाँ रकमान्तर गरेर भुक्तानी लिएका थिए । महाशाखाबाट घटनाको अनुसन्धान गर्दा श्रवनकुमार श्रेष्ठ, सुनिता श्रेष्ठ र शुभशंकर पन्जालगायतका व्यक्तिहरू पक्राउ परेका थिए।
