काठमाडौँ । पछिल्लो समय बैंक तथा वित्तीय संस्थामा कर्जाको माग बढ्न थालेको छ । नेपाल बैंकर्स संघका अनुसार  पछिल्लो समय बैंक तथा वित्तीय संस्थामा निक्षेपको तुलनामा कर्जाको माग बढ्न थालेको हो । संचालनमा रहेका २७ वाणिज्य बैंकहरुले १ महिनामा ४२ अर्ब रुपैयाँ निक्षेप संकलन गर्दा ४६ अर्ब रुपैयाँ कर्जा प्रवाह गरेका हुन् । 

संघका अनुसार कात्तिक दोस्रो सातासम्म वाणिज्य बैंकहरुले ३६ खर्ब ३३ अर्ब रुपैयाँ निक्षेप संकलन गरेका थिए । जुन मंसिरको दोस्रो साता ४२ अर्ब रुपैयाँले बढेर ३६ खर्ब ७५ अर्ब रुपैयाँ पुगेको छ । कर्जा प्रवाहतर्फ भने कार्तिक दोस्रो साता ३० खर्ब २० अर्ब रुपैयाँ प्रवाह गरेकोमा मंसिरको दोस्रो साता ४६ अर्ब रुपैयाँले बढेर ३० खर्ब ६६ अर्ब रुपैयाँ पुगेको छ । 

यस्तै बैंकहरुले कात्तिक तेस्रो साता ३० खर्ब ३१ अर्ब रुपैयाँ र कात्तिक अन्तिम साता ३० खर्ब ५२ अर्ब रुपैयाँ कर्जा प्रवाह गरेका थिए । यद्यपि मंसिरको पहिलो साता बैंकहरुमा कर्जा प्रवाह २ अर्ब रुपैयाँले घटेको देखिन्छ भने मंसिरको दोस्रो साता नै १६ अर्ब रुपैयाँले बढेको छ ।