• अर्थ सरोकार सम्बाददाता

काठमाडौं । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ । आज कुन कुन ठाउँमा के के भयो ? यी दृश्यहरु आफैं बोलिरहेछन् । आजको अंकमा हामीले कालीगण्डकी नदीको पूर्वी किनारा पर्वतको कुश्मा नगरपालिका-१ पाङको बगरमा स्काभेटर प्रयोग गरेर नदीजन्य पदार्थको उत्खनन गरिएकोदेखि झापाको कमल गाउँपालिका-७ स्थित मेमेङ टोलका किसानले लगाएको हरियाली चैते धानसम्मका दृश्यलाई फोटोमा समेटेका छौं।

कालीगण्डकी नदीको पूर्वी किनारा पर्वतको कुश्मा नगरपालिका-१ पाङको बगरमा स्काभेटर प्रयोग गरेर नदीजन्य पदार्थको उत्खनन गरिँदै । कानुनी रुपमा नदीजन्य पदार्थको उत्खनन्मा स्काभेटरको प्रयोग गर्न पाइँदैन ।

बागलुङ बजारको मुख्यचोकमा रहेको श्रेष्ठ हार्डवयर पसलमा शुक्रबार विद्युत सर्ट भएर लागेको आगोलाई निभाउँदै सुरक्षाकर्मी ।

झापाको कमल गाउँपालिका– ७ स्थित मेमेङ टोलका एक किसानले लगाएको हरियाली चैते धान ।

बेनी-दरवाङ सडक कालोपत्रे योजनामा ढिलाई भएपछि शुक्रबार यातायात आवगमन अवरोधका लागि उत्रिएका म्याग्दीको बेनी नगरपालिका-७ मङ्गलाघाटका स्थानीय । सडक कालोपत्रे छिटो गर्न मङ्गलाघाटका बासिन्दाले जिल्ला प्रशासन कार्यालयमा धर्नासमेत दिएका थिए ।

ताप्लेजुङको फुङलिङ नगरपालिकाले ७५ प्रतिशत अनुदानमा दिएको भेंडाका पाठापाठीका साथमा किसान । नगरपालिकाले अनुदानमा किसानलाई ५८ वटा भेंडाको पाठापाठी दिएको हो ।

तनहुँको देवघाट गाउँपालिका–३, ल्हुङग्रिङमा निर्माण गरिएको चण्डीश्वरी आमा समूह र शान्ति सामुदायिक युवा क्लबको संयुक्त भवन । भवन नहुँदा क्लब र आमा समूहको बैठक बस्न कठिनाई भएपछि गाउँपालिकाको सहयोगमा भवन निर्माण गरिएको हो ।

व्यास नगरपालिका-१० मा निर्माण गरिएको दरै समुदायको घुमाउने घर । आधुनिकतासँगै मौलिक सम्पदाको लोप हुँदै जान थालेपछि वडाको सक्रियतामा घुमाउने घर निर्माण गरिएको हो ।

सिमरास्थित इलाका प्रहरी कार्यालयको शुक्रबार नवर्निमित भवनको रिबन काटेर उद्घाटन गर्ने क्रममा प्रहरी अतिरिक्त महानिरीक्षक निरजबहादुर शाही ।

धनगढीको नैनादेवी मन्दिर नजिकै एक स्थानीयवासीले व्यावसायिक रुपमा पालेका हाँस । पछिल्लो समय धनगढी आसपासका क्षेत्रमा स्थानीयवासीले कुखुरा, हाँस, टर्की, बट्टाईलगायत पक्षी पाल्न शुरु गरेका छन् ।

धनगढी उपमहानगरपालिका-२ पुरानो भन्सार कटान गाउँमा शुक्रबार सडक निर्माण गरिँदै । पुरानो भन्सार गाउँमा सडक बिग्रिएका कारण स्थानीयवासीले लामो समयदेखि आवतजावतमा समस्या झेल्दै आएका छन् ।