- सुदर्शन श्रेष्ठ/अर्थ सरोकार सुदूरपश्चिम ब्युरो
धनगढी । सुदूरपश्चिम प्रदेशकै रेफरल सेन्टरको रुपमा रहेको सेती प्रादेशिक अस्पतालमा बिरामीको संख्यामा कमि आएको छ । कोरोना भाईरस (कोभिड १९) को संक्रमण सूरु भएयता खचाखच भएका सेती अस्पतालका बेड अहिले खाली भएका छन् ।
कोरोनाको संक्रमण दिनप्रतिदिन बढेसँगै भरिभराउ भएका अस्पतालका शैया अहिले खाली हुँदै गएका छन् । प्रदेशकै ठूलो र रेफरल सेन्टरको रुपमा रहेको सेती प्रादेशिक अस्पतालमा भरिएका शैया अहिले खाली हुँदै गएका छन् । दैनिक आउने बिरामीको संख्या घट्दै गएको र निको हुनेको संख्यामा वृद्धी हुँदै जानुले अस्पतालका बेड खाली भएको सेती प्रादेशिक अस्पतालका सुचना अधिकारी दिलिप कुमार श्रेष्ठले बताए ।
‘अहिले अस्पतालमा रहेको १६ वटा आईसियु भने भरिभराउ छ’, श्रेष्ठले भने, ‘बेडको हकमा भने २९ बेड खाली छन् ।’ उपचारका लागि पहिलाको जस्तो पेटी, प्यासेज र उभिएरै गर्नुपर्ने अवस्था नरहेको समेत श्रेष्ठले बताएका छन् । उनले थपे, ‘माहामारीकाबीच विभिन्न संस्था र व्यक्तित्वबाट प्राप्त भएका स्वास्थ्य सामाग्रीले पनि उपचारमा ठूलो सहयोग पुगेको छ ।’
बुधबारको तथ्याङक अनुसार सेती प्रादेशिक अस्पतालमा उपचारका लागि ६६ जना भर्ना भएका थिए । जसमध्ये २२ जना निको भएको र हाल अस्पतालमा ४४ जना बिरामी उपचाररत अवस्थामा रहेका छन् । दिनानुदिन अवस्था सामान्य बन्दै गएको र बिरामीको संख्या पनि निरन्तर घट्दै गएकोले पहिलो जस्तो आत्तिनुपर्ने अवस्था नरहेको श्रेष्ठको भनाई रहेको छ ।
