- अर्थ सरोकार सम्बाददाता
काठमाडौँ । नेपाल धितोपत्र बोर्डका अध्यक्ष भिष्मराज ढुङ्गानाले अन्य क्षेत्र सुस्ताएका कारण अहिले दोस्रो बजारमा लगानीकर्ताको आकर्षण बढेको बताएका छन् । बोर्डको २९औं वार्षिकोत्सवको अवसरमा आयोजित भर्चुअल कार्यक्रमममा उनले यस्तो बताएका हुन् । अध्यक्ष ढुङ्गानाले लगानीकर्ताको संख्या उल्लेख्य वृद्धि हुँदा दोस्रो बजारको आकार इतिहासकै उच्च बिन्दुमा पुगेको बताएका छन् ।
पछिल्लो समय लगानीकर्ता निकै उत्साहित बनेर दोस्रो बजारमा लागेका छन् । जसकारण अहिले बजारमा १८ अर्बसम्मको कारोबार हुने गरेको छ । दोस्रो बजारमा हुने कारोबारबाट सरकारको राजश्वसमेत फराकिलो अन्तरले बढेको अध्यक्ष ढुङ्गानाको भनाई छ । अहिले सरकारलाई एक महिना दिनमा एक अर्बको राजश्व यो क्षेत्रबाट जाने गर्दछ ।
कार्यक्रममा बोल्दै उनले धितोपत्रको कारोबारका लागि अलग्गै ऐनको मस्यौदा बनाएर अघि बढ्ने तयारी भएको पनि बताए । साथै बजारको बिस्तारका लागि नयाँ धितोपत्र दलाल व्यवसायीलाई बजार प्रवेश गराइने, नेप्से र सिडिएससीको संरचना परिमार्जन गर्दै राफसाफ कोष सञ्चालनमा ल्याइने बताए ।
