काठमाडौँ । आदर्श लघुवित्त वित्तीय संस्थाले ६० लाख बराबरको ६० हजार कित्ता आईपीओ जारी गर्ने भएको छ ।लघुवित्तले जारी पूँजी २ करोडको ३० प्रतिशत सेयर सर्वसाधारणमा बिक्रीमा ल्याउने भएको हो । आईपिओ निष्काशनको लागि लघुवित्त कम्पनीले बिओके क्यापिटललाई बिक्री प्रबन्धक नियुक्त गरेको हो ।
सम्झौताअनुसार सेयर निष्काशन भईसकेपछि सेयर रजिष्ट्रारको कार्य पनि बि.ओ.के. क्यापिटलले नै गर्नेछ । बिक्री प्रबन्धक नियुक्ति सम्बन्धि सम्झौतामा आदर्श लघुवित्तको तर्फबाट प्रमुख कार्यकारी अधिकृत राजेश शर्मा र बि.ओ.के. क्यापिटलको तर्फबाट प्रमुख कार्यकारी अधिकृत कुन्दन शर्माले हस्ताक्षर गरेका छन् ।
गत आवको तेस्रो त्रैमाससम्मा लघुवित्तले १५ लाख ८२ हजार रुपैयाँ खुद नाफा आर्जन गरेर वार्षिक प्रतिसेयर आम्दानी १५.०६ रुपैयाँ कायम भएको छ । १ अर्ब ४० करोड रुपैयाँ चुक्ता पूँजी रहेको लघुवित्तको खराब कर्जा अनुपात १.२७ प्रतिशत रहेको छ ।
लघुवित्तको असार ३१ गते सम्पन्न भएको तेश्रो वार्षिक साधारणसभाले सर्वसाधारणमा साधारण सेयर निष्काशन गर्ने प्रस्ताव पारित गरे बमोजिम प्रकृया अगाडि बढाएको हो । बोर्डबाट अनुमति पाएपछि मात्र लघुवित्तको सेयर बिक्रीमा आउनेछ ।
