- अर्थ सरोकार सम्बाददाता
काठमाडौँ । मनकामना स्मार्ट लघुवित्त वित्तीय संस्थाको आईपीओमा झन्डै १९ लाखले आवेदन दिएका छन् । बिक्री प्रबन्धक एनएमबि क्यापिटलको अनुसार सोमबार बिहान १०ः३० बजेसम्ममा १८ लाख ९६ हजार ९२२ आवेदकले २ अर्ब ४८ करोड ४५ लाख रुपैयाँ बराबरको २ करोड ४८ लाख ४५ हजार ३६० कित्ता सेयर खरिदको लागि आवेदन दिएका हुन् । जुन सर्वसाधारणको लागि छुट्टाएको ३ लाख ६३ हजार ४९२ कित्ताको ६८.३५ गुणा बढी हो ।
आईपीओ गोलाप्रथाबाट न्यूनतम १० कित्ता बाँडफाँड गर्दा भाग्यमानी ३६ हजार ३४९ जनाले मात्रै लघुवित्तको सेयर पाउने छन् । बाँकीको हात भने खाली हुनेछ । असार १७ गतेदेखि बिक्री खुला भएको लघुवित्तको आईपीओमा आज मंगलबार कार्यालय समयावधी भित्र आवेदन दिन सकिनेछ ।
कम्पनीले असार १७ गतेदेखि प्रतिकित्ता १०० अंकित मूल्यका ३ लाख ८९ हजार कित्ता साधारण सेयर निष्काशनमा ल्याएको हो । यसमध्ये लघुवित्तले ६ हजार ५८ कित्ता अर्थात जारी पूँजीको ०.५ प्रतिशत सेयर कर्मचारीहरुका लागि र कुल निष्काशनको ५ प्रतिशत अर्थात १९ हजार ४५० कित्ता शेयर सामूहिक लगानी कोषका लागि छुट्याएको छ । सर्वसाधारणले बाँकी ३ लाख ६३ हजार ४९२ कित्ताका लागि आवेदन दिन सक्नेछन् ।
