काठमाडौं । मुक्तिनाथ विकास बैंकको १२ लाख ५० कित्ता ऋणपत्र आज बिहिबारदेखि बिक्री खुला भएको छ । बैंकले १ अर्ब २५ करोड रुपैयाँ बराबरको १ हजार रुपैयाँ अंकित मूल्यमा उक्त ऋणपत्र बिक्रीमा ल्याएको हो ।
जसमा ५ लाख इकाई सर्वसाधारणका लागि खुला भएको छ भने बाँकी ७ लाख ५० हजार इकाई बैंकले आफ्नै पहलमा अन्य संघ–संस्थालाई बिक्री गर्नेछ । यस ऋणपत्रमा वार्षिक ८.७५% ब्याजदर पाइनेछ । लगानीकर्ताले न्यूनतम २५ कित्तादेखि अधिकतम ५ लाख कित्तासम्मका लागि साउन ११ गतेसम्म आवेदन दिन सक्नेछन् । उक्त समयमा सबै ऋणपत्र बिक्री नभएमा साउन २१ गतेसम्म बिक्री खुला हुनेछ ।
यस ऋणपत्रमा सी–आस्वा, मेरो सेयर तथा तोकिएको बैंक तथा वित्तीय संस्थाको शाखा कार्यालयबाट आवेदन दिन सकिनेछ । बैंकले ७ वर्ष अवधिको मुक्तिनाथ विकास बैंक डिबेन्चर जारी गरेको हो । यसमा बिक्री प्रबन्धकको काम सानिमा क्यापिटल मार्केटले गरेको छ।
