मोरङ । नेपाल बंगलादेश बैंकले नयाँ विस्तारित सेवा केन्द्र सञ्चालनमा ल्याएको छ । बैंकले मोरङको लेटाङ नगरपालिकास्थित बुधबारे बजारमा विस्तारित सेवा केन्द्र सञ्चालनमा ल्याएको हो । उक्त विस्तारित सेवा केन्द्रको उद्घाटन प्रदेश १ मोरङ ‘ख’ का प्रदेश सांसद उपेन्द्र घिमिरेले गरेका हुन् ।
बुधबारे बजार लेटाङ नगरपालिका वडा नम्बर १, २ र ३ तथा केराबारी गाउँपालिका वडा नम्बर ९ को केन्द्रको रूपमा स्थापित भई बैंकिङ पहुँचबाट टाढा रहेको अवस्थामा नगरपालिकाको आग्रह र ग्रामीण भेगमा वित्तीय पहुँच पुर्याउने उद्देश्यले सेवा केन्द्र सञ्चालनमा ल्याइएको बैंकले जनाएको छ ।
विस्तारित सेवा केन्द्रबाट चेक क्लियरिङ, सामाजिक सुरक्षा भत्ता, शिक्षक एवं कर्मचारीको तलबी खाता सञ्चालनलगायत सेवा उपलब्ध हुने बैंकले बताएको छ । बैंकले हाल ९९ शाखा, ८ एक्सटेन्सन काउन्टर तथा ८२ एटीएममार्फत बैंकिङ सेवा प्रदान गर्दै आईरहेको छ ।
