- अर्थ सरोकार सम्बाददाता
काठमाडौं । सर्वोच्च अदालतले २८ घण्टाभित्र कांग्रेस सभापति शेरबहादुर देउवालाई प्रधानमन्त्री नियुक्त गर्न परमादेश जारी गरेको छ । आज बसेको संवैधानिक इजलासले सो आदेश जारी गरेको हो ।
अदालतले प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले गरेको प्रतिनिधिसभा विघटनलाई असंवैधानिक ठहर गर्दै बदर गरेको हो । जेठ ७ गते मध्यरातमा विघटन भएको प्रतिनिधिसभा पुनर्स्थापना गर्दै सर्वोच्च अदालतको संवैधानिक इजालसले संविधानको धारा ७६(५) अनुसार देउवालाई प्रधानमन्त्री नियुक्ति गर्न परमादेश जारी गरेको हो ।
राष्ट्रपति भण्डारीले दोस्रोपटक जेठ ७ गते मध्यरातमा प्रतिनिधिसभा विघटन गरेकी थिइन् । त्यसअघि प्रधानमन्त्री ओलीले ७ गते मध्यरातमा मन्त्रिपरिषदको बैठक राखेर प्रतिनिधिसभा विघटन गर्ने सिफारिस गरेका थिए । यता ओली सरकार ढलेसंगै आर्थिक क्षेत्रमा अर्थमन्त्री को बन्ला भन्ने चौतर्फी चासोको विषय बनेको छ ।
यता केहि समय अगाडी शेर बहादुर देउवाले आफुलाई ज्योतिषीले ५ पटक प्रधानमन्त्री बन्ने भविष्यवाणी गरेको बताएका थिए ।
