काठमाडौँ । जिल्ला प्रशासन कार्यालय काठमाडौंले आउँदै गरेका पर्व सांकेतिक रूपमा मनाउन आग्रह गरेको छ । कोरोनाको संक्रमणदर र जोखिम बढेकाले आउँदै गरेका जनैपूर्णिमा, गाईजात्रा, ऋषितर्पणीलगायत पर्व सांकेतिक रूपमा मनाउन आग्रह गरेको हो ।
जिल्ला प्रशासन कार्यालयले बिहीबार एक सूचना जारी गर्दै काठमाडौं जिल्लामा साउन २८ देखि भदौ ८ सम्म निषेधाज्ञा जारी रहेको स्मरण गराउँदै सोही अवधिमा ती पर्व पर्ने भएकाले सांकेतिक रुपमा मनाउन अनुरोध गरेको हो । स्वास्थ्य प्रोटोकलको पूर्ण पालना गरी परम्परागत रुपमा सांकेतिक तवरले पर्व मनाउन र भिडभाडजन्य गतिविधि नगर्न आग्रह गरिएको छ ।
