काठमाडौँ । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ । आज कुन कुन ठाउँमा के के भयो ? यी दृश्यहरु आफैं बोलिरहेछन् ।

जीविकोपार्जनको लागि पाल्पाको तानसेन नगरपालिका–२,मेहलधारामा मकै बिक्री गर्दै महिला ।

म्याग्दीको रघुगङ्गा गाउँपालिका–८, छिसखर्कको चरन क्षेत्रमा चर्दै गरेका भेंडा । किसानले छिसखर्कमा परम्परागत रुपमा घुम्तीगोठ राखेर भेंडापालन गर्दै आएका छन् ।

खाना पकाउने ग्यासलगायत दैनिक उपभोग्य वस्तु ढुवानीका लागि हिमाली भेगमा खच्चडको प्रयोग गरिँदै ।

काभ्रेपलाञ्चोकको बनेपा नगरपालिका–४ बुलेस्थित खेतमा टनेलमा गरिएको गोलभेंडा खेती ।

घोराही ५ धर्ना धारपानी मन्दिरदेखि करिब दुई हजार ५०० मिटरको उचाईमा रहेको सुनकोटस्थित देवीको मन्दिर जाने सिढीमा आन्तरिक पर्यटक । उक्त मन्दिरमा जान चार हजार ९६३ सिढी बनाइँदै छ ।

म्याग्दीको रघुगङ्गा गाउँपालिकामा निर्माण हुन लागेको ४० मेगावाट क्षमताको राहुघाट जलविद्युत् आयोजनाको रघुगङ्गा–४ र ५ वडाको सिमानामा बाँध निर्माण गरिँदै । नेपाल विद्युत् प्राधिकरणको सहायक कम्पनी रघुगङ्गा हाइड्रोपावर लिमिटेडले यो आयोजना निर्माण गर्न लागेको छ ।

काभ्रेपलाञ्चोकको बनेपा नगरपालिका–२ डुँडामुख, बाघखोरस्थित निर्माणाधीन आकाशदेवी पार्कमा हालै राखिएको बाघको मूर्ति । स्थानीय युवाले पार्क निर्माण गरी आन्तरिक पर्यटन प्रबद्र्धन गर्न बाघको मूर्ति राखेका हुन् ।