काठमाडौं । अबदेखि प्रेस काउन्सिल नेपालले एक-आपसमा मिल्दाजुल्दा डोमेनको न्युज पोर्टल सूचिकृत नगर्ने भएको छ । काउन्सिलले शुक्रबार एक सूचना जारी गर्दै दर्ता भइ सञ्चालन भइसकेका मिडियालाई आधार बनाई अगाडि वा पछाडि कुनै अंक वा अक्षर जोडेर डोमेन दर्ता/मिडिया दर्ता बनाई गराई मिल्दोजुल्दो मास्टहेड, लोगो र नाम (डोमेन नेम) लिएर सूचिकृत हुन आएका न्युज पोर्टललाई सूचिकृत नगर्ने निर्णय गरेको हो ।
हालै बसेको काउन्सिलको आचारसंहिता अनुगमन उपसमितिको बैठकले यस्तो निर्णय गरेको काउन्सिलले जनाएको छ । पहिले नै सञ्चालित अनलाइन मिडियाबाट यस्ता विषयमा काउन्सिलमा पटक-पटक उजुरी/गुनासाहरु आउने गरेको सार्वजनिक सूचनामा उल्लेख छ ।
अनलाइन सञ्चारमाध्यम सञ्चालन निर्देशिका २०७३ (पहिलो संशोधन, २०७४) मा अनलाइन सञ्चारमाध्यम सूचना तथा प्रसारण विभागमा दर्ता हुने व्यवस्था छ । यस्तै पत्रकार आचारसंहिता पालना सम्बन्धमा अनुगमन एवम् निरीक्षण र अभिलेखीकरणका लागि प्रेस काउन्सिलले सूचिकृत गर्दै आएको छ ।
