काठमाडौं । साताको कारोबारको अन्ति दिन बिहीबार नेप्से १७.५७ अंकले बढेको छ । आज सबैभन्दा धेरै १४ कम्पनीका लगानीकर्ताले कमाएका छन् । जसमा नारायणी डेभलपमेन्ट बैंक, श्री ईन्भेष्मेनट फाइनान्स, गुहेश्वरी मर्चेन्ट बैंक एण्ड फाइनान्स, अरुण भ्याली हाइड्रोपावर डेभलपमेन्ट कम्पनी, कर्पोरेट डेभलपमेन्ट बैंक, आँखुखोला जलविद्युत कम्पनी, घलेम्दी हाइड्रोपावर र जीवन विकास लघुवित्त वित्तीय संस्था रहेका छन् । यस कम्पनीहरुको १० प्रतिशतले सेयर मूल्य बढेको हो ।

यस्तै ६ वटा कम्पनीहरुको भने ९ प्रतिशतभन्दा बढीले सेयर मूल्य बढेको छ। नेपाल स्टक एक्सचेन्जका अनुसार आज कुल २२३ कम्पनीको २ करोड १६ लाख ९० हजार ५८५ कित्ता सेयर खरिद बिक्री हुँदा १३ अर्ब ४२ करोड १९ लाखमाथिको सेयर कारोबार भएको छ ।