काठमाडौँ । प्रहरीले बैंकिङ कसुरको मुद्दामा फरार रहेका अभियुक्तलाई पक्राउ गरेको छ । महानगरीय अपराध महाशाखाको टोलीले दुई करोड रुपैयाँ जरिवाना तथा कैद सजाय पाएका काठमाडौं बुढानिलकण्ठ घर भई बारा सिमरा उपमहानगर बस्ने ६७ वर्षीय कृष्णबहादुर थापालाई पक्राउ गरेको हो ।

उनलाई जिल्ला प्रहरी कार्यालय बारा र पर्सासँग समन्वय गरी शनिबार पक्राउ गरी काठमाडौं ल्याएको महाशाखाले जनाएको छ । उनीविरूद्ध बैंकिङ कसुरमा तीन वटा मुद्दाको सजाय बेरूजु छन् । पहिलो मुद्दामा उनीविरूद्ध रवीन्द्र थापाको जाहेरी दिएका थिए ।

सो मुद्दामा गत मंसिर २२ गते उच्च अदालत पाटनले कृष्णबहादुर थापालाई एक करोड २५ लाख रुपैयाँ जरिवाना र १७ दिन कैद सजाय सुनाएको थियो। अर्को मुद्दाको जाहेरी पनि थापाले नै दिएका थिए। सो मुद्दामा उच्च अदालत पाटनले ७५ लाख रुपैयाँ जरिवाना र १३ दिन कैद सजाय सुनाएको महाशाखाले जनाएको छ।

तेस्रो मुद्दामा कृष्णबहादुरविरूद्ध राजन श्रेष्ठले बैंकिङ कसुरको मुद्दामा जाहेरी दिएका थिए । २०७३ माघ ६ गते काठमाडौं जिल्ला अदालतले १७ लाख रुपैयाँ भरपाई गराउने र त्यसको ब्याजसमेतको बिगो दाखिला गर्न आदेश दिएको थियो। तर उनी फरार थिए । त्यसपछि काठमाडौं जिल्ला अदालतले २०७५ असार १९ गते एक वर्ष कैद सजाय सुनाएको थियो ।