काठमाडौं । सेयर लगानीकर्ताहरुले आजदेखि माइतीघर मण्डलामा रिले अनसन सुरु गरेका छन् । पूँजी बजार सुधार सङ्घर्ष समितिको आयोजनामा आज ३ बजेदेखि लगानीकर्ताले रिले अनसन सुरु गरेका हुन् । आफूहरुले उठाएका मागहरु सम्बोधन नभएकाले आजदेखि २९ गतेसम्म दैनिक रुपमा दिउँसो ३ बजेदेखि ५ बजेसम्म रिले अनसन गर्ने समितिले जनाएको छ ।
लगानीकर्ताले गत सोमबार गभर्नर महाप्रसाद अधिकारीको राजिनामाको मुख्य मागसहित १८ बुँदे माग राख्दै नेपाल राष्ट्र बैंकका प्रवक्ता देव कुमार ढकाललाई ज्ञापनपत्र बुझाएका थिए । आज पनि उनीहरुले विभिन्न किसिमका नारासहित अनसनमा उत्रिएका हुन् । उनिहरुले राष्ट बैंकले नियोजित रूपमा ल्याएका नीति, कार्यक्रम र कार्यनीतिहरूले समग्र पूँजी बजारमा असर पारेको आरोप लगाएका छन् ।
