काठमाडौं । सामलिङ पावर कम्पनीको ५ लाख कित्ता आइपीओमा आवेदन दिने आज बुधबारसहित ३ दिन बाँकी रहेको छ । असोज १ गतेसम्म कम्पनीको सो सेयरमा लगानीकर्ताले आवेदन दिन सक्ने भएका हुन् । यद्यपि उक्त अवधिसम्म सबै सेयर बिक्री नभएमा भने असोज १७ गतेसम्म खुला रहनेछ ।
यस कम्पनीले भदौ १८ गतेदेखि आयोजना प्रभावित इलामवासीका लागि १०० रुपैयाँ अंकित दरमा ५ लाख कित्ता आईपीओ बिक्रीमा ल्याएको हो । जसमध्ये अति प्रभावित क्षेत्र इलाम नगरपालिका वडा नं ८ र १० तथा माईजोगमाई गाउँपालिका वडा नं ४ र ५ का स्थानीय बासिन्दालाई ४०% अर्थात २ लाख कित्ता सेयर छुट्याइएको छ ।
बाँकी ६०% अर्थात ३ लाख कित्ता भने इलाम जिल्लाभरका स्थानीयका लागि छुट्याइएको छ । लगानीकर्ताले न्यूनतम १० कित्तादेखि अधिकतम २० हजार कित्तासम्म आवेदन दिन सक्नेछन् । यस्तै लगानीकर्ताहरुले इलाम जिल्लामा रहेका सिद्धार्थ बैंक, एनएमबि बैंक, नेपाल एसबीआई बैंक, सिभिल बैंक र लक्ष्मी बैंकको शाखा कार्यहरुबाट आवेदन दिन पाउनेछन् ।
यसमा बिक्री प्रबन्धकको काम नेपाल एसबीआई मर्चेन्ट बैंकिङले गरेको छ । हाल सामलिङ पावरद्वारा इलाम जिल्लामा निर्माणाधिन माइबेनी जलविद्युत आयोजना अन्तिम चरणमा रहेको छ ।
