काठमाडौं । सीवाइसी नेपाल लघुवित्तले ३ लाख ९५ हजार ३३६ कित्ता आइपीओ बिक्री गर्ने भएको छ । कम्पनीले ३ करोड ९५ लाख ३३ हजार ६०० रुपैयाँ बराबरको सो कित्ता सेयर जारी गर्न धितोपत्र बोर्डसँग अनुमति मागेको हो । बोर्डले अनुमति दिएपछि कम्पनीले आइपीओ निष्कासन प्रकृया अघि बढाउनेछ । यसमा बिक्री प्रबन्धकको काम ग्लोबल आइएमई क्याटिलले गर्नेछ ।
यस लघुवित्तले हालै मात्र म्याग्दी जिल्लाको बेनीमा केन्द्रीय कार्यालय राखी गण्डकी प्रदेशमा लघुवित्त कारोबार गरिरहेको शालीग्राम लघुवित्तलाई एक्विजिशन गरेको छ । एक्विजिशनपश्चात् वित्तीय संस्थाको अधिकृत पूँजी २० करोड रुपैयाँ र जारी पूँजी १२ करोड १६ लाख ४१ हजार ८३७ रुपैयाँ पुगेको छ ।
संस्थापक समूहको ६७.५० प्रतिशत सेयर रहेको यस वित्तीय संस्थामा १ वटा संस्थासहित ९९ जना संस्थापक सेयरधनीहरुबाट ८ करोड २१ लाख ८ हजार २ सय ४० रुपैयाँ बराबरको सेयर पूँजी चुक्ता भइसकेको छ भने हाल ३७ वटा शाखा कार्यालयहरुमार्फत संस्थाले सेवा दिइरहेको छ ।
