काठमाडौं । वाणिज्य बैंकहरुको कार्तिक महिनामा निक्षेप संकलन घटेको छ भने कर्जा लगानी बढेको छ । बैंकहरुको निक्षेप ३५ अर्ब ३१ करोड रुपैयाँले घट्दा कर्जा लगानी भने ३६ अर्ब १२ करोड रुपैयाँले बढेको हो । वाणिज्य बैंकको छाता संगठन नेपाल बैंकर्स संघकाअनुसार कात्तिक ३० गतेसम्म आइपुग्दा बैंकहरुले ४२ खर्ब ३३ अर्ब रुपैयाँ निक्षेप संकलन गरेका छन् । यसअघि असोज ३१ गतेसम्म बैंकहरुले ४२ खर्ब ६९ अर्ब रुपैयाँ निक्षेप संकलन गरेका थिए ।
२७ वाणिज्य बैंकहरुमध्ये १९ वटाको निक्षेप खुम्चिएको छ र ८ वटाको बढेको छ । कार्तिक महिनामा सबैभन्दा धेरै एनआईसी एशिया बैंकको निक्षेप घटेको छ । यस बैंकको १३ अर्ब ८९ करोड रुपैयाँले निक्षेप घटेको हो । यस्तै राष्ट्रिय वाणिज्य बैंकको १० अर्ब ३४ करोड रुपैयाँले निक्षेप घटेको छ । हिमालयन बैंकको भने सर्वाधिक १४ अर्ब ६० करोड रुपैयाँले निक्षेप बढेको छ भने एनएमबी बैंकको ४ अर्ब ८७ करोड रुपैयाँले निक्षेप बढेको छ ।
निक्षेप घटेपनि अधिकाशं बैंकहरुले कर्जा लगानी भने विस्तार गरेको छ । २७ वाणिज्य बैंकहरुमध्ये ९ वटाको कर्जा लगानी घटेको छ भने १८ वटा वाणिज्य बैंकहरुको कर्जा लगानी बढेको छ । यस अवधिमा सबैभन्दा धेरै कर्जा विस्तार गर्नेमा हिमालयन बैंक नै रहेको छ । यस बैंकले ६ अर्ब ७ करोड रुपैयाँले कर्जा विस्तार गरेको हो । सबैभन्दा धेरै कर्जा खुम्चिनेमा राष्ट्रिय वाणिज्य बैंक रहेको छ । यसको २ अर्ब ५६ करोड रुपैयाँले कर्जा लगानी घटेको हो । कात्तिक महिनामा वाणिज्य बैंकहरुले ३६ अर्ब रुपैयाँ कर्जा प्रवाह गरेका छन् । यस्तै कर्जा लगानी भने ४० खर्ब ३४ अर्ब रुपैयाँ गरेका छन् । असोज ३१ गतेसम्म बैंकहरुले ३९ खर्ब ९८ र्अ रुपैयाँ कर्जा प्रवाह गरेका थिए ।
