काठमाडौं । नागरिक लगानी कोषले चालु आर्थिक वर्षको पहिलो त्रैमासको वित्तीय विवरण सार्वजनिक गरेके छ । कम्पनीले पहिलो त्रैमासमा १९ करोड ७२ लाख ४२ हजार रुपैयाँ खुद नाफा आर्जन गरेको छ । यो नाफा गत वर्षकोभन्दा ३५.१३ प्रतिशतले बढी हो । गत वर्ष कम्पनीले १४ करोड ५९ लाख ६६ हजार रुपैयाँ खुद नाफा आर्जन गरेको थियो ।

यस्तै कम्पनीको ब्याज आम्दानी पनि ३ करोड १२ लाख रुपैयाँबाट बढेर ५ करोड ८३ लाख रुपैयाँ पुगेको छ । कम्पनीको सेवा शुल्क तथा कमिसन आम्दानी पनि २२ करोड ९९ लाख रुपैयाँबाट बढेर २८ करोड १२ लाख रुपैयाँ पुगेको छ । गत वर्ष १ अर्ब ६४ करोड रुपैयाँ सेयर पुँजी रहेको कम्पनीको यस त्रैमासमा ९९.३१ प्रतिशतले बढेर ३ अर्ब २७ करोड रुपैयाँ पुगेको छ ।

यस्तै जगेडा कोष पनि ८ अर्ब २८ करोड रुपैयाँबाट बढेर १९ अर्ब ४ करोड रुपैयाँ पुगेको छ । कम्पनीको प्रतिसेयर आम्दानी वार्षिक ३२ रुपैयाँ ८६ पैसाबाट घटेर २४ रुपैयाँ १३ पैसा पुगेको छ भने प्रतिसेयर नेटवर्थ २३८ रुपैयाँबाट घटेर १५२ रुपैयाँ पुगेको छ ।