काठमाडौं । मेगा बैंकको वार्षिक साधारणसभा हुने भएको छ । कैंकको ११औं वार्षिक साधारणसभा मंसिर २८ गते हुने भएको हो । सभा नेपाल प्रज्ञा प्रतिष्ठान, कमलादी काठमाडौंमा बिहान ११ः१५ बजेदेखि सभा सुरु हुने भएको छ । बैंकले गत आर्थिक वर्षको नाफाबाट लगानीकर्तालाई १० प्रतिशत बोनस सेयर र कर प्रयोजन सहित गरेर २.०७ प्रतिशत नगद लाभांश वितरण गर्ने प्रस्ताव पेश हुनेछ ।
बोनस वितरणपछि चुक्ता पुँजी वृद्धि हुने भएकोले प्रबन्धपत्र तथा नियमावली संसोधन गर्ने एजेण्डा पनि रहेको छ । यसैगरी अन्य बैंक तथा वित्तीय संस्थाहरुसँग गाभ्ने/गाभिने सम्बन्धि सम्पूर्ण कार्य गर्न सञ्चालक समितिलाई अख्तियारी प्रदान गर्ने एजेण्डा पनि रहेको छ । यस्तै आर्थिक वर्ष २०७७/७८ को वासलात, नाफा-नोक्सान र नगद प्रवाहमाथि छलफल हुनेछ ।
आर्थिक वर्ष २०७८/७९ का लागि लेखापरीक्षक नियुक्त गरी पारिश्रमिक निर्धारण गर्ने प्रस्ताव पनि रहेको छ । सभा तथा लाभांश वितरण प्रयोजनार्थ बैंकले मंसिर १४ गते बुक क्लोज गर्ने भएको छ । तसर्थ मंसिर १३ गतेसम्म नेप्सेमा कायम सेयरधनीले मात्र लाभांश पाउन सक्नेछन् ।
