देश बोल्ने फोटो कथा : भत्ता लिन एक दिनको बाटो हिँडेर बैंक पुगे वृद्धवृद्धा, संरक्षणको पर्खाइमा मकवानपुरगढी दरबार…!

काठमाडौँ । देशभर विभिन्न घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ ।

आज कुन कुन ठाउँमा के के भयो ? यी दृश्यहरु आफैं बोलिरहेछन् । आजको अंकमा हामीले जाजरकोटको नलगाड नगरपालिकाको प्रशासकीय केन्द्र दल्लीस्थित बैंकमा सामाजिक सुरक्षाभत्ता लिन फम्दाबाट एक दिन हिँडेर आएकावृद्धवृद्धादेखि संरक्षणको पर्खाइमा रहेको मकवानपुरगढी दरबारसम्मका तस्विरलाई फोटोमा समेटेका छौं ।

हेरौं फोटो समाचार :

नलगाड नगरपालिकाको प्रशासकीय केन्द्र दल्लीस्थित बैंकमा सामाजिक सुरक्षाभत्ता लिन फम्दाबाट एक दिन हिँडेर आएका नागरिक ।

मकवानपुरको मकवानपुरगढी गाउँपालिका वडा नं २ मा अवस्थित गढी दरबार । विसं १८१९ माघ १० गते मिरकासिमका फौजविरुद्ध गोर्खाली सेनाले विजयी प्राप्त गरेको मकवानपुरगढी अहिले भग्नावशेष मात्रै रहेको छ ।

डाला, भकारी बिक्री गर्दै गाउँ घुमेका व्यापारी । यतिबेला धान, कोदोलगायत बाली भित्र्याउने समय भएकाले यस्ता सामग्रीको गाउँघरमा माग हुने गर्दछ ।

शुक्लाफाँटा नगरपालिका– २ का महिला किसान कात्तिके उखु रोप्दै ।

पाँचथरको मिक्लाजुङ गाउँपालिकामा पहिराले क्षति गरेको घरका काठ, जस्तालगायत सामग्री निकालिँदै ।

पहिरोले क्षतविक्षत बनेको पाँचथरको मिक्लाजुङ गाउँपालिका । गत कात्तिक १ गतेदेखि ३ गतेसम्म परेको वेमौसमी वर्षाका कारण यत्रतत्र पहिरो जाँदा यो गाउँपालिकामा ठूलो भौतिक क्षति भएको छ ।