काठमाडौं । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ ।
आज कुन कुन ठाउँमा के के भयो ? यी दृश्यहरु आफैं बोलिरहेछन् ।आजको अंकमा हामीले व्यावसायिक रुपमा सिताके च्याउ खेती गर्दै गरेका स्याङ्जाका एक युवकदेखि भूकम्पले क्षतिग्रस्त जयवागेश्वरी मन्दिर पुनःनिर्माण हुँदैसम्मका तस्विरलाई फोटोमा समेटेका छौं ।
हेरौं फोटो समाचार :
स्याङ्जाको वालिङ नगरपालिका -२ धौखोलाका युवा हरि अर्यालले व्यावसायिक रुपमा सिताके च्याउ खेती गर्न तयारी अवस्थामा राखेको मुढा ।
पुनःनिर्माण हुँदै गरेको पशुपति क्षेत्रस्थित जयवागेश्वरी मन्दिर । विसं २०७२ वैशाख १२ को भूकम्पले क्षतिग्रस्त मन्दिर पुनःनिर्माणले ढिलै भएपनि गति लिएको छ ।
बन्दिपुर गाउँपालिका–५ थुम्काबाट धार्मिक पर्यटकीयस्थलको रुपमा परिचित आँधीमूल जाने मोटरमार्ग निर्माण गरिँदै । गाउँपालिकाले चार लाख बजेट विनियोजन गरेपछि स्थानीय युवाको सक्रियतामा सोलभञ्ज्याङ हुँदै थुम्का, भुजेल गाउँ हुँदै आँधीमूलसम्मको करिब दुई किलोमिटर मोटरमार्गको ट्र्याक खोल्ने कार्य शुरु गरिएको हो ।
सोलुदूधकुण्ड नपा, सल्लेरी नयाँ बजारमा घुम्न आएका विदेशी पर्यटक ।
स्याङ्जाको वालिङ नगरपालिका-२ धौखोलास्थित बारी पाक्दै गरेको कोदोबाली ।
घले गाउँमा परम्परागत वेशभूषामा गुरुङ समुदायका महिला । पृष्ठभूमिमा लमजुङ हिमाल ।
पाँचथरको मिक्लाजुङ गाउँपालिका–२ सप्तमीमा हावाबाट बिजुली निकाल्न राखिएको मिनिग्रीड । यहाँ वैकल्पिक ऊर्जा प्रवद्र्धन केन्द्रले एसियाली विकास बैङ्कको सहयोगमा २० किलोवाटको वायु ऊर्जा उत्पादनका लागि मिनिग्रीड स्थापना गरेको हो । तर प्राविधिक समस्या आइरहँदा वायु ऊर्जा उत्पादन भने नियमित हुन सकिरहेको छैन ।
