काठमाडौं । नेपाल वेयर हाउस कम्पनीले साधारण शेयर बिक्री गर्ने भएको छ । कम्पनीको सभाले प्रबन्धपत्र संशोधन गर्ने गरी अधिकृत पूँजी ७० करोड रुपैयाँ र जारी पूँजी ६८ करोड ७५ लाख रुपैयाँ पुर्याउने प्रस्ताव पनि पारित गरेको छ । हालै सम्पन्न कम्पनीको साधारणसभाले १३ करोड ७५ लाख रुपैयाँ बराबरको साधारण शेयर निष्कासन गर्ने भएको छ । साधारण शेयर विक्रीका लागि कम्पनीले सम्बन्धित नियामक निकायमा प्रस्ताव पेश गर्ने निर्णय गरेको छ ।
कम्पनीका अध्यक्ष आनन्तकुमार बगडियाले कम्पनीलाई थप विस्तार गर्ने उद्देश्यका साथ साधारण शेयर विक्री गर्ने प्रस्ताव गरिएको जानकारी दिए। एभरेष्ट बैंकको सहवित्तीयकरणमा निर्माण भइरहेको कम्पनीको सुनसरी, पर्सा र कपिलवस्तु कार्यालयबाट कुल ५५ हजार मेट्रिकटन अन्न भण्डारण हुनेछ ।
निम्बस ग्रप, शिखर इन्स्योरेन्स, एनएमबि बैंक, श्रीनगर एग्रो फार्म, टीएएनए इन्भेष्टमेन्ट कम्पनी, टिम भेञ्चर्सलगायतको लगानी रहेको उक्त कम्पनीमा थप केही व्यासायिक र वित्तीय संस्थाले १५ करोड रुपैयाँ लगानी गरिसकेका छन् ।
कम्पनीले अन्न भण्डारणका अतिरिक्त वेयहाउस रिसिप्ट फाइनान्सिंग, अक्सन मार्केट सुविधा, बल्क टन्सपोटेसन र वन स्टप एग्री सोलुसनलगायतका सुविधा उपलब्ध गराउने छ । निर्माणधीन तीन ओटा इकाईमध्ये सुनसरीको औरावानीस्थित कार्यालयबाट आगामी दुई महीनाभित्र व्यावसायिक काम शुरु हुने कम्पनीले बताएको छ ।
