जाजरकोट । अनेक पहुँच र विधि प्रयोग गरेर ठेक्का लिने तर काम नगर्दा जाजरकोटको विद्युतीकरणमा समस्या देखिएको छ । ठेकेदारले तोकिएको समयमा विद्युत् लाइन विस्तार र पोल गाड्ने काम नगर्दा ठूला योजनादेखि विद्युत्बाट सञ्चालन हुने विभिन्न कार्य अलपत्र परेका छन् । विद्युतीकरण नहुँदा सङ्घीय तथा प्रदेश सरकारको लगानीमा सञ्चालन हुने विभिन्न योजना पनि अलपत्र परेका हुन् । ११ केभी प्रशारण लाइनको पोल गाडेको तीन वर्षसम्म पनि विद्युत् लाइन विस्तार नहुँदा यसबाट सञ्चालन हुने कार्यमा बाधा पुग्दै आएको छ ।
खलङ्गा–बाहुन थाना, पाँच काटियाहुँदै कुशे गाउँपालिकाको विभिन्न ठाउँमा लाइन विस्तारका लागि तीन वर्षदेखि काम नहुँदा विद्युत्बाट हुने काममा बाधा पुगेको हो । त्यस्तै खलङ्गा हुँदै नलगाड नगरपालिका र बारेकोट गाउँपालिका जोड्ने मुख्य लाइन नलगाडको कालीमाटीभन्दा अगाडि बढ्न नसकेपछि अर्को समस्या थपिएको छ । लाइन विस्तारको जिम्मेवारी लिएका ठेकेदारले समयमा काम नगर्दा विकास निर्माणमा समेत बाधा पुगेको हो ।
विद्युतीकरणको अभावमा २० लाखमा स्थापना गर्न लागेको प्रि फ्याब प्राविधिकको कोल्डस्टोर (शीतभण्डार) स्थापनामा चुनौती थपिएको छ । कृषि विकास कार्यालय, जाजरकोटले फलफूललाई सुरक्षित बनाउका लागि सहकारी संस्थाबाट प्रस्ताव गत भदौमा मागेको थियो । कार्यालयले मागेको मापदण्डमा फेज लाइन वा विद्युत् सञ्चालन हुने क्षेत्र भनि उल्लेख गरेपछि पहिलो पटकको प्रस्ताव अस्वीकृत भएका थिए ।
फेरि कार्यालयले सोही मापदण्ड राखेर पुस ७ गते दोस्रो पटक सूचना प्रकाशित गरेको छ । दोस्रो पटकको पनि फलफूल उत्पादन हुने क्षेत्रमा विद्युत् नपुगेकाले असफल हुने हो की भन्ने चिन्ता बढेको कुशे गाउँपालिकाका अगुवा किसान शक्तिबहादुर ओलीले बताउनुभयो । “विद्युत् नभएको ठाउँमा शीतभण्डार सञ्चालन हुन सक्दैन”, कृषि विकास कार्यालयका प्रमुख रवीन धितालले भन्नुभयो, “पहिला पनि प्रस्ताव माग गरिएको रहेछ, तर मापदण्ड नपुगेर काम हुन सकेन । फेरि पनि प्रस्ताव माग गरेका छौँ, मापदण्ड पुगे काम हुन्छ । नत्र बजेट र्फिता जान्छ ।”
त्यस्तै अघिल्लो वर्ष दूध डेरी स्थापना गर्ने भन्दै पन्चासे सहकारी संस्था नलगाड नगरपालिकाको कालीमटीले १६ लाखमा खरिद गरिएको उपकरण विद्युत्कै अभावमा सञ्चालन गर्न सकेको छैन । पशु अस्पताल तथा पशुसेवा कार्यालयको अनुदानमा उक्त उक्त उपकरण सहकारी संस्थाले खरिद गरिएको थियो । दूध उत्पादनका लागि राम्रो क्षेत्र मानिएको नलगाडको लहँ, डाडाँगाउँलाई केन्द्रमा राखेर उक्त मेसिन जडान गरिए पनि कामविहीन भएको छ । सहकारीले आफ्नै लगानीमा जेनेरेटर खरिद गर्न समस्या भएको भन्दै अब केही दिनमा जसरी पनि उक्त मेसिन सञ्चालन गर्नका लागि पहल सुरु भएको प्रबन्धक किशोर रावलले बताउनुभयो ।
जिल्लास्थित सरकारी कार्यालयको अनुदान सहयोगमा सञ्चालन हुने विभिन्न कार्यक्रम विद्युतीकरणको अभावमा अलपत्र पर्ने गरेको छ । त्यस्तै जिल्लाभरिका स्थानीय तहलेसमेत विभिन्न प्रविधिसँग जोडिएका किसान मैत्री कार्यक्रम सञ्चालन गर्न खोज्दा मापदण्ड नपुगेको भन्दै बजेट फिर्ता हुनेगरेको गुनासो गरेका छन् ।
नेपाल विद्युत् प्राधिकरणले निर्माण व्यवसायीलाई कारबाही गर्नुको ठाउँमा संरक्षण गर्दै जाँदा जाजरकोटमा अहिलेसम्म सबै ठाउँमा भइसक्ने विद्युतीकरण रोकिएको छ । जनप्रतिनिधिदेखि पहुँचवाला राजनीतिक दलका व्यक्तिलाई फाइदा पुग्ने गरी ठेक्का दिँदा जिल्लाको विद्युतीकरणमा बाधा पुगेको सर्वसाधारणको गुनासो छ ।
शिवालय, जुनिचाँदे, नलगाड र बारेकोटमा लाइन विस्तारको ठेक्का लागेको चार वर्षपछि बल्ल काम गर्ने भन्दै दुई दिनअघि निर्माण व्यवसायी तेजविक्रम शाह र निर्माण व्यवसायी शान्तबहादुर बस्नेतले सामग्री बुझेर लगेको जाजरकोट वितरण केन्द्रका प्रमुख अविशेक राजले बताउनुभयो ।
ठेकेदारले केही सामग्री तीन वर्षअघि बुझेर लिए पनि जथाभावी फ्याँक्दा पहिरो तथा खोलाले बगाइसकेको छ । लाइन विस्तारका लागि सबै सामग्री आइसकेकाले अब बहानाबाजी बनाएर काम रोक्ने अधिकार कसैलाई नभएको प्रमुख अविशेकले बताउनुभयो । त्यस्तै जिल्लाका बडावन, समाइला, चौखामा निर्माण गर्ने भनिएका सवस्टेशनको कामसमेत धिमागतिमा भएकाले जिल्लाको विद्युतीकरणमा समस्या देखिएको हो ।-रासस
