काठमाडौं । माउन्टेन हाइड्रो नेपाल लिमिटेडको छैठौं वार्षिक साधारणसभा पुष २९ गते हुने भएको छ । कम्पनीको पुष ७ गते बसेको संचालक समितिको बैठकले सभा पुष २९ गते कालिमाटि ब्यांक्वेट, कालिमाटि काठमाडौंमा बिहान ११ बजे भर्चुअल माध्यमबाट बोलाउने निर्णय गरेको हो ।

सभाले आर्थिक वर्ष २०७७/०७८ को वार्षिक प्रतिवेदन उपर छलफल गरी पारित गर्नेछ भने सोही आवको आर्थिक विवरण (वासलात, नाफा नोक्सान हिसाब, तथा नगद प्रवाहलगायतका वित्तीय विवरणहरु) माथि छलफल र स्वीकृत गर्ने सभाको एजेण्डा रहेको छ ।

आव २०७८/०७९ को लागि लेखापरिक्षक नियुक्त गर्ने तथा निजको पारिश्रमिक निर्धारण गर्ने, सर्वसाधारण समुहबाट निर्वाचित संचालक शिव प्रसाद त्रिपाठीले राजिनामा दिई रिक्त रहेको पद निर्वाचनद्धारा पूर्ति गर्ने एजेण्डा पनि सभामा रहेको छ ।

यता कम्पनीले पुष १५ गते बुक क्लोज गर्ने निर्णय गरेको छ । जस अनुसार पुष १४ गतेसम्म कायम सेयरधनीहरुले मात्र सभामा भाग लिन पाउनेछन् ।