काठमाडौं । नेपाल इन्भेष्टमेन्ट बैंकको वार्षिक साधारणसभा हुने भएको छ । बैंकको वार्षिक साधारणसभा मंसिर १७ गते शुक्रबार हुने भएको हो । उक्त सभाले बैंकले प्रस्तावगरेको १२.६११ प्रतिशत बोनस सेयर र ३.३८९ प्रतिशत नगद लाभांश पारित गर्नेछ । साथै अन्य कुनै बैंक तथा वित्तीय संस्थालाई मर्ज वा एक्वायर गर्नुपरेमा सम्पूर्ण अख्तियारी सञ्चालक समितिलाई दिने प्रस्ताव पनि रहेको छ ।
बैंकले अधिकृत पुँजी बढाएर १८ अर्ब ५० करोड रुपैयाँ पुर्याउने प्रस्ताव पनि पेश हुनेछ । यस्तै बोनस सेयर वितरणपछि चुक्ता पुँजी बढ्ने भएकाले सोही अनुसार प्रबन्धपत्र संशोधन गर्ने एजेण्डा पनि रहेको छ ।सभा बैंकको केन्द्रीय कार्यालय दरबारमार्ग काठमाडौंमा बिहान १० बजे सुरु हुनेछ ।
सभामा भिडियो कन्फ्रेन्सको माध्यमबाट पनि सहभागी हुन सकिनेछ । हाल यस बैंकको सेयर कारोबार रोक्का भएको छ । हिमालयन र इन्भेष्टमेन्ट एक आपसमा मर्जमा गएकाले दुवै बैंकको वैशाख ३१ गतेदेखि सेयर कारोबार रोक्का भएको हो । मर्ज भएपछि हिमालयन एण्ड नेपाल इन्भेष्टमेन्ट बैंकको नामबाट सेयर कारोबार खुल्नेछ ।
