काठमाडौं । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ ।
आज कुन-कुन ठाउँमा के-के भयो ? यी दृश्यहरु आफैं बोलिरहेछन् । आजको अंकमा हामीले योमरी पूर्णिमाका दिन आइतबार असनमा योमरी किन्दै सर्वसाधारणदेखी होमस्टेमा परम्परागत थारु नृत्य देखाउँदै चितवनका कलाकारसम्मका तस्विरलाई फोटोमा समेटेका छौं ।
हेरौं फोटो समाचार :
योमरी पूर्णिमाका दिन आइतबार असनमा योमरी किन्दै सर्वसाधारण । योमरी चाकु, तिल र खुवा राखेर बनाइन्छ
चितवनको भरतपुर नगरपालिका–२७ स्थित थारु सामुदायिक होमस्टे मेघौलीमा परम्परागत थारु नृत्य देखाउँदै कलाकार । प्रकृति र संस्कृतिका कारण मेघौली स्वदेशी एवम् विदेशी पर्यटकको आकर्षक गन्तव्य बन्दै गएको छ ।
बेनी–जोमसोम–कोरला सडक आयोजनाअन्तर्गत मुस्ताङको धासाङ गाउँपालिका–२ बोक्सीखोला क्षेत्रमा कालोपत्रे गरिएको सडक र त्यहाँबाट देखिएको धौलागिरि हिमशृङ्खला ।
काठमाडौंको इन्द्रचोकमा जाडोमा प्रयोग गरिने न्यानो कपडा किन्दै सर्वसाधारण ।
डोल्पोबुद्ध गाउँपालिका–१ ‘धो’ बाट चरिचरण क्षेत्रतिर ल्याइएका भेडा र च्याङ्ग्रा । पाटन क्षेत्रमा हिउँ भारी मात्रामा भएकाले तल्लो क्षेत्र चरिचरणका लागि रोजाइ हुँदै आएको छ ।
मुस्ताङको प्रसिद्ध धार्मिकस्थल मुक्तिनाथ मन्दिरमा पूजाअर्चनाका लागि आएका भक्तजनको चहलपहल । यहाँ देशका विभिन्न जिल्ला तथा भारतबाट समेत भक्तजन आउने गरेका छन् ।
