काठमाडौँ । बैंकिङ कसुर मुद्दामा फरार रहेका अभियुक्त पक्राउ परेका छन् । प्रहरीले मंगलबार ४० लाख जरिवाना तोकिएका रामेछापको सुनापती गाउँपालिका–५ घर भएका ४४ वर्षीय तोरण बावु श्रेष्ठलाई रामेछापको खाँडादेवी गाउँपालिका स्थित लुभुघाटबाट पक्राउ गरेको हो ।
उच्च अदालत पाटनले २०७७ जेठ २७ मा उनलाई ४० लाख जरिवाना र १० दिन कैद हुने फैसला गरेको थियो । फैसलापछि उनि फरार थिए । काठमाडौंबाट रामेछाप जाँदै गरेको सुराकको आधारमा प्रहरी चौकी लुभुघाटबाट खटिएको टोलीले उनलाई पक्राउ गरेको हो ।
फैसला कार्यान्वयनका लागि उनलाई जिल्ला अदालत रामेछापमा उपस्थित गराइने प्रहरीले जनाएको छ । श्रेष्ठले खातामा पैसा नभएको जानेर दिएको चेक बाउन्स भएको थियो ।
