काठमाडौं । नेपाल राष्ट्र बैंकले विदेशी रक्सीको कारोबार गर्ने ग्रीनलाइन सेन्टर प्रालिलाई बैंकहरुले दिएको कर्जा विवरण मागेको छ । कम्पनीका संचालक अभिषेक अग्रवाल र अमित अग्रवाल बैंकको १ अर्ब बढी कर्जा नतिरी भागेपछि राष्ट्र बैंकले सो विवरण माग गरेको हो ।
हाल ग्रीनलाइनको सोरुममा नेपाल इन्भेष्टमेन्ट बैंक र एभरेष्ट बैंकको मात्रै सूचना टास गरिएको छ तर संचालकले भने ५ वाणिज्यबाट लिएको ऋण नतिरी भागेका हुन् । यी २ बैंकले सो कम्पनीलाई हाइपोथेकेसन कर्जा दिएको जनाएका छन् । यस्तै ग्लोबल आइएमई बैंकलेसमेत कम्पनीका सञ्चालकलाई ऋण दिएको बताइएको छ ।
अग्रवाल दाजुभाई बैंकको ऋण नतिरी भागेपछि अहिले कम्पनीको कान्तिपथ र दरबारस्थित दुबै शोरुम एक सातायता बन्द छन् । कम्पनीमा अभिषेक अग्रवाल प्रबन्ध निर्देशक र अमित अग्रवाल प्रमुख कार्यकारी अधिकृतका रुपमा जिम्मेवारी सम्हालेका थिए ।
सन् १९९९ मा जनकपुरका ओमप्रकाश अग्रवालले ग्रीनलाइन सेन्टर कम्पनी स्थापना गरेका थिए । कम्पनीले महंगा विदेशी ब्राण्डका रक्सीहरु बिक्री गर्दै आएको थियो ।
