काठमाडौँ । प्रधानमन्त्री शेरबहादुर देउवाले चुनावको मिति तय गर्नको लागि निर्वाचन आयोगका पदाधिकारीसँग छलफल गर्ने भएका छन् । आउँदो जेठमा स्थानीय तहको चुनाव गर्ने सत्ता गठबन्धनको निर्णयलाई कार्यान्वयन गर्न देउवाले आयोगका पदाधिकारीसँग मंगलबार दिउँसो ३ छलफल गर्न लागेका हुन् ।
जेठ ५ गते बहालवाल स्थानीय जनप्रतिनिधिको कार्यकाल सकिने भएकाले त्यसअघि नै चुनाव गर्ने गरी सरकारले चुनावका मिति घोषणा गर्न लागेको हो । सोमबार बागमती प्रदेशका कांग्रेस नेताहरुसँगको भेटमा प्रधानमन्त्री देउवाले जेठ ४ गते स्थानीय तहको चुनाव गर्ने बताएका थिए । यता स्वास्थ्य तथा जनसंख्यामन्त्री विरोध खतिवडाले बिहीबार बस्ने मन्त्रिपरिषद्को बैठकले चुनावको मिति घोषणा गर्न सक्ने बताए ।
