काठमाडौं । झण्डै ३ लाख रुपैयाँ नक्कली नेपाली नोटसहित चार जना पक्राउ परेका छन् । अपराध अनुसन्धान महाशाखा, बानेश्वरको टोलीले काठमाडौं महानगरपालिका–१६ नयाँबजार मेडिकल चोक एरियाबाट नक्कली नेपाली नोटसहित ४ जनालाई पक्राउ गरेको हो ।

पक्राउ पर्नेमा रौतहटका पृथ्वीप्रसाद शाह, मुसरफ अली, असरफ अली सहिद र महमद शम्साद आलम छन् । बुधबार दिउँसो प्रहरीले उनीहरुलाई १ हजार दरका २ सय ९४ थान नक्कली नेपाली नोट पक्राउ गरेको थियो । उक्त स्थानमा नक्कली नोटको अवैध कारोबार भइरहेको भन्ने सूचनाको आधारमा महानगरीय अपराध महाशाखाबाट खटिएको प्रहरीले उक्त परिमाणको नक्कली नेपाली नोटसहित फेला पारी उनीहरुलाई पक्राउ गरेको हो ।

यस सम्बन्धमा थप अनुसन्धान भइरहेको उक्त महाशाखाले जनाएको छ ।