काठमाडौं । नेपालको लोकप्रिय एप हाम्रो पात्रोले अब आफ्नै डिजिटल वालेट सञ्चालनमा ल्याउने तयारी गरेको छ ।सुपर एप बन्ने लक्ष्यमा रहेको हाम्रोपात्रोले त्यसलाई प्रभावकारी बनाउन भुक्तानी सेवाको क्षेत्रमा हात हालेको जनाएको हो । राष्ट्र बैंकले भुक्तानी सेवा प्रदायकका लागि नयाँ लाइसेन्स जारी गर्न बन्द गरिसकेको अवस्थामा हाम्रो पात्रोले यसअघि नै अस्तित्वमा रहेको लेनदेन सेवा खरिद गरेको बताएइको छ ।
हाम्रो पात्रो इंकले आफ्नो ७५ प्रतिशत सेयर स्वामित्व रहने गरी उक्त भुक्तानी सेवा प्रदायकमा लगानी गरेको हो । जारी अनुमतिपत्र बिक्री गर्न नपाउने राष्ट्र बैंकको नियमका कारण अधिकांश सेयर लगानीको रुपमा हाम्रो पात्रोले डिजिटल वालेट आफ्नो बनाएको हो ।
लेनदेन सेवामा हाम्रो पात्रोको लगानीलाई राष्ट्र बैंकले समेत स्वीकृति दिइसकेको बताइएको छ । टेकुमा केन्द्रिय कार्यालय रहेको लेनदेन सेवाले २० माघ २०७७ मा नेपाल राष्ट्र बैंकबाट भुक्तानी सेवाको अनुमतिपत्र पाएको थियो ।यसअघि एक करोड रहेको कम्पनीको चुक्ता पूँजी हाम्रो पात्रोको प्रवेशसँगै बढ्नेछ । वालेट खरिद गरेसँगै त्यसलाई अब नयाँ स्वरूपमा रिब्रान्डिङ गर्ने योजनामा हाम्रोपात्रो रहेको बुझिएको छ ।
सम्भवतः अब लेनदेन सेवाको नाम समेत परिवर्तन गरी ‘हाम्रो पे’ बन्नेछ । त्यसो त यस अघि नै कम्पनीका बोर्ड अफ डिरेक्टरका अध्यक्ष रुद्र पाण्डेले हाम्रो पात्रो अब सुपर एप बन्ने र त्यसमा डिजिटल वालेट समेत समावेश गर्ने उल्लेख गरेका थिए ।
