काठमाडौं । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ ।
पर्यटकीय तथा धार्मिकस्थलका रुपमा परिचित सल्यानको बनगाँड कुपिन्डे नगरपालिका–८ मा पर्ने कुपिन्डे तालमा डुु्ङगामा सयर गरी मनोरञ्जन लिँदै आन्तरिक पर्यटक । एक हजार २०० मिटर लम्बाई र ६९ मिटर गहिराई रहेको सो तालमा पछिल्लो समय डुङ्गा चलाउन थालिएको छ ।
गर्मी बढेसँगै काठमाडौँको बालाजुस्थित चक्रपथ छेउमा बालबालिकालाई पौडी खेल्न प्रयोग गरिने विभिन्न सामग्री राखेर ग्राहकको प्रतीक्षामा बसेका सडक व्यापारी ।
आवश्यक रेखदेख नपुग्दा कवाडीका सामान राख्ने र शौच गर्ने थलोमा परिणत भएको नेपाल वायुसेवा निगमको धनगढी उपमहानगरपालिका—१ मा रहेको जग्गा । यो जग्गाको एक दशकभन्दा बढी समयदेखि रेखदेखको अभावमा बेवारिसे जस्तो बनेको छ ।
सिन्धुपाल्चोकको मेलम्ची–११ स्थित टारका किसान खेतमा आलु खन्दै । खनिएका आलु खेतबाटै बजार लैजान किसानले बोरामा व्यवस्थापन गरी राखेका हुन्।
अन्नपूर्ण पदमार्ग अन्तर्गत मनाङ र लमजुङको सिमानामा पर्ने मस्याङ्दी गाउँपालिका–४ च्याम्चेमा रहेको बुङ्क छहरामा मनोरञ्जन लिन आएका विदेशी पर्यटक । दैनिक २० देखि ३० जना विदेशी पर्यटक मनाङ भित्रने गरेका छन् ।
बागलुङ नगरपालिका–४ ओडारचौरका किसान कृष्णप्रसाद पौडेलको फार्ममा व्यवसायीक रुपमा गरीएको भैंसी पालन ।
तनहुँको म्याग्दे गाउँपालिका–५ दोभानस्थित सेती नदीको घाटमा अव्यवस्थित ढंगले ढुङ्गा, गिटी, बालुवा उत्खनन् गरिँदै ।
म्याग्दीको धवलागिरी गाउँपालिका–१ गुर्जाका बासिन्दा भेडाको ऊन प्रसोधन गर्दै । आधुनिक प्रविधिको अभावमा उद्यमीहरु परम्परागत तरिकाले ऊन प्रसोधन गर्दै आएका छन् ।
