देश बोल्ने फोटो कथा : धमिलो पानी खान बाध्य भक्तपुरका स्थानीयवासी, संरक्षणको अभावमा भत्किन थाले पुराना घर

काठमाडौं । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ ।

आज कुन-कुन ठाउँमा के-के भयो ? यी दृश्यहरु आफैं बोलिरहेछन् । आजको अंकमा हामीले भक्तपुर नगरपालिका–५, खँल्लामा इनारबाट तानेको धमिलो पानी भर्दै गरेका महिलादेखि संरक्षणको अभावमा भत्किन थालेका म्याग्दीको रघुगङ्गा गाउँपालिका–४ दर्मिजा गाउँका पुराना घरसम्मका तस्विरलाई फोटोमा समेटेका छौं ।

हेरौं फोटो समाचार :

भक्तपुर नगरपालिका–५, खँल्लामा इनारबाट तानेको धमिलो पानी भर्दैै महिला । काठमाडौँ उपत्यका खानेपानी (काउखाली) ले भक्तपुर नगरका केही ठाउँमा दिन बिराएर, कतै पाँच दिनको एक पटक, कतै हप्तामा एक दिन पानी वितरण गरे पनि खँल्लामा भने महिनौँसम्म पानी नपठाएपछि स्थानीयवासी धमिलो पानी प्रयोग गर्न वाध्य छन् ।

म्याग्दीको रघुगङ्गा गाउँपालिका–४ दर्मिजा गाउँमा भत्किएका पुराना घर । घरमुली सहरमा बसाइँ सरेपछि यस्ता परम्परागत पुराना घरहरु संरक्षणका अभावमा भत्किन थालेका छन् ।

वरिष्ठ कलाकार श्यामानन्द सिंह ठकुरीले बनाएका हस्तकलाका सामग्रीको नेपालगञ्जमा प्रदर्शनी । तीनदिने श्यामानन्द वृहत एकल कला प्रदर्शनीको मंगलबार समापन हुँदैछ ।

म्याग्दीको मालिका गाउँपालिका–६ बलौटेमा म्याग्दी नदीको कटान नियन्त्रणका लागि पक्कि संरचना निर्माण गरिँदै ।

कलुवापुर बेलौरी सडकखण्डको कलुवापुरस्थित धुलाम्मे सडकमा गुडिँरहेको सवारी साधन । सडक निर्माण कम्पनीले बेवास्ता गर्दा सडकमा यात्रुलाई हिँडन र चालकलाई सवारीसाधन सञ्चालनमा सकस भएको छ ।