भक्तपुर नगरपालिका–४, तालक्वमा परालको सुकुल बुन्दै एक वृद्ध । खेतीपाटीको काम गर्न नसकेपछि सुकुल बुन्ने काम गरेको उहाँ बताउँछन् ।

कञ्चनजङ्घा हिमाल आरोरहण गर्न ताप्लेजुङको सदरमुकाम फुङ्लिङमा ढुवानीका लागि राखिएका आरोहणका सामग्री ।

महोत्तरीको जलेश्वर नगरपालिका क्षेत्रका बगैँचामा आँपका बोटमा ढकमक्क फुलेको फूल । बगैँचामा आँप ढकमक्क फुलेकाले यस वर्ष उत्पादन राम्रो हुने नगरवासीको अनुमान छ ।

तनहुँको ऋषिङ गाउँपालिका–१ मा निर्माणाधीन १४० मेगावाट क्षमताको तनहुँ जलविद्युत् आयोजनाको बाँधस्थल । आयोजनाको पहिलो प्याकेजअन्तर्गत १४० मिटर अग्लो ड्यामको निर्माण सोङ्दा–कालिका जेभीले गरिरहेको छ ।

परम्परागत भेषभूषामा सजिएका हुम्लाको उत्तरी नाम्खा गाउँपालिकाको हेप्का गाउँका लामा समुदायका महिला ।

दार्चुलाको नौगाड गाउँपालिका–१ का स्थानीयवासी खच्चडमार्फत अल्लो ढुवानी गर्दै । यस गाउँपालिकामा सबैभन्दा बढी अल्लो उत्पादन हुने गर्छ । सडक नपुगेका कारण उनीहरुले खच्चडमार्फत अल्लो ढुवानी गरेका हुन् ।

म्याग्दीको धवलागिरि गाउँपालिका–१ गुर्जाको जङ्गलमा सङ्कलन गरेर सुकाइएको लोत्ता । लोत्ता प्रसोधन गरेर नेपाली कागज बनाउने गरिन्छ ।