काठमाडौं । उपत्यकाभित्र अनाधिकृत प्लटिङ बढेपछि जग्गा किनबेचमा प्रतिबन्ध लगाउने भएको छ । काठमाडौं उपत्यका विकास प्राधिकरणले अनुमति नलिई गरिएका २ सय बढी प्लटिङका जग्गा किनबेचमा प्रतिबन्ध लगाउने भएको हो । भक्तपुर र ललितपुरका २ सयभन्दा बढी ठाउँमा बिना अनुमति प्लटिङ भईरहेको पाईएको पनि प्राधिकरणले जनाएको छ ।
यस्तै प्राधिकरणले अनुमति नलिई प्लटिङ भईरहेका ठाउँको जग्गाको कित्ता खोज्ने काम पनि भईरहेको छ । सबै ठाउँको कित्ता नम्बर भेटिएपछि एकुमष्ट रुपमा सम्बन्धित जिल्लाको जिल्ला मालपोत कार्यालयलाई पत्राचार गरेर जग्गा रोक्का राखिने प्राधिकरणले जनाएको छ ।
यता प्राधिकरणले अनाधिकृत प्लटिङको जग्गा रोक्का राखेपनि डेभलपर्सहरुले तोकिएको मापदण्ड पूरा गरेपछि फुकुवा गरिदिने भएको छ । मापदण्ड अनुसार ५ प्रतिशत खुला ठाउँ र २० फिटको बाटो कायम गर्दा रोक्का राखेको जग्गा पनि फुकुवा हुनेछ । तर यदि मापदण्ड पूरा नभएको खण्डमा भने रोक्का राखिएका प्लटिङको जग्गाको किनबेचमा पूणर्रुपमा बन्देज लगाईने प्राधिकरणले जनाएको छ ।
