काठमाडौं । नेपाल राष्ट्र बैंक कर्मचारी संघले राष्ट्र बैंकमै कालो ब्यानर झुण्ड्याएर प्रदर्शन गरेका छन् । सरकारले गभर्नर महाप्रसाद अधिकारीलाई निलम्बन गरेको विरोधमा कर्मचारी संघले राष्ट्र बैंकमै कालो ब्यानर झुण्ड्याएर प्रदर्शन गरेका हुन् । सरकारी निर्णयको विरोधमा कालो ब्यानर झुण्ड्याएर कोणसभा आयोजना गरेको संघका सचिव कृष्ण प्रसाद खरालले जानकारी दिए ।
राष्ट्र बैंकका केन्द्रीय कार्यालयलगायत उपत्यकाबाहिरका पनि सबै कार्यालयमा एकैसाथ कालो ब्यानर टाँगेको विरोध गरिएको छ । ब्यानरमा ‘केन्द्रीय बैंकको स्वायत्ततामाथिको नांगो हस्तक्षेप बन्द गर’, निराधार तथा कपोलकल्पित आरोपमा गभर्नर महाप्रसाद अधिकारीमाथि सुरु गर्रिएको कारबाही प्रक्रिया अविलम्ब फिर्ता गर’ र संकटोन्मुख राष्ट्रिय अर्थतन्त्रको उद्धारका लागि तत्काल विशेष नीति तर्जुमा गरी कार्यान्वयन गर’जस्ता नारा लेखिएको छ ।
कार्यक्रममा संघका अध्यक्ष रुद्रप्रसाद तिम्सिना, वरिष्ठ उपाध्यक्ष पदमराज जोशी, उपाध्यक्ष उमाकान्त थपलिया, महासचिव थपलिया, महासचिव शंकर प्रसाद भट्टराईलगायत संघका केन्द्रीय समितिका पदाधिकारी तथा सदस्य, बालुवाटार र थापाथली समितिका पदाधिकारी, सदस्य र साधारणसदस्यलगायत उपस्थिति रहेको थियो ।
