काठमाडौं । नेपाल राष्ट्र बैंकले शोधानान्तर स्थिति २ खर्ब ५८ अर्ब ६४ करोड रुपैयाँले घाटामा रहेको जनाएको छ । नेपाल राष्ट्र बैंकले चालु आर्थिक वर्षको आठ महिनाको आर्थिक तथा वित्तीय स्थिति सार्वजनिक गर्दै फागुन मसान्तसम्म देशबाट बाहिरिने रकम र भित्रने रकमको अन्तर (शोधानान्तर) स्थिति २ खर्ब ५८ अर्ब ६४ करोड रुपैयाँले घाटामा रहेको जनाएको हो ।

अघिल्लो वर्षको सोही अवधिमा शोधनान्तर स्थिति ६८ अर्ब १ करोड रुपैयाँले बचतमा रहेको थियो । अमेरिकी डलरमा अघिल्लो वर्षको फागुन मसान्तसम्म ५६ करोड ५८ लाखले बचतमा रहेको शोधनान्तर स्थिति यस वर्षको ८ महिनामा २ अर्ब १७ करोडले घाटामा रहेको छ ।

फागुन मसान्तसम्ममा चालु खाता ४ खर्ब ६२ अर्ब ९३ करोड रुपैयाँले घाटामा रहेको छ । अघिल्लो वर्षको यसैअवधिमा चालु खाता १ खर्ब ५१ अर्ब ४२ करोड रुपैयाँले घाटामा रहेको थियो ।