काठमाडौं । सरकारले निर्यातमा अनुदान दिने प्रणाली परिवर्तन गर्ने तयारी गरेको छ । सरकारले आगामी आर्थिक वर्षको नीति तथा कार्यक्रम र बजेटमार्फत् निर्यातमा नगद अनुदान दिने व्यवस्था परिवर्तन गर्न लागिएको हो । उद्योग वाणिज्य तथा आपुर्ति मन्त्रालयले बढी मूल्यवृद्धि हुने उत्पादनमा बढी रकम नगद अनुदान दिने व्यवस्था गर्न लागेको बताएको छ ।
निर्यातमा अनुदान प्रदान गर्ने सम्बन्धी कार्यविधि २०७५ अनुसार स्वदेशी कच्चा पदार्थ प्रयोग हुने १५ वस्तुमा निर्यात मूल्यको ५ प्रतिशत नगद अनुदान दिने व्यवस्था गरिएको छ । स्वदेशी तथा आयात गरेका कच्चा पदार्थबाट उत्पादन हुने १२ वस्तु निर्यात गर्दा ३ प्रतिशत नगद अनुदान दिने व्यवस्था कार्यविधिले गरेको छ ।
