काठमाडौं । गौतम बुद्ध क्षेत्रीय अन्तर्राष्ट्रिय विमानस्थल जाने वायुसेवालाई विशेष छुट दिने भएको छ । जीबीआईएको व्यवसायिक संचालन सफल बनाउनका लागि नेपाल नागरिक उड्डयन प्राधिकरणले वायुसेवा कम्पनीहरुलाई विभिन्न किसिमका सहुलियतहरु दिने भएको हो ।
प्राधिकरणले आफ्नो सेवा जीबीआईएमा पनि थाल्ने अन्तर्राष्ट्रिय वायुसेवा कम्पनीहरुलाई ल्याण्डिङ, पार्किङ, सेक्युरिटी, उड्डयन सहायता सेवा लगायतमा शतप्रतिशत सहुलियत दिने भएको हो ।
यस्तो सहुलियत एक वर्षसम्मका लागि दिने गरी पर्यटन मन्त्रालयलाई क्यानले प्रस्तावसमेत बुझाएको छ । यो प्रस्ताव स्विकृत भएसँगै प्राधिकरणले हालै संशोधन गरेको विमानस्थल सेवा शुल्क नियमावली लागू हुने मितिदेखि योजना कार्यन्वयनमा ल्याउने भएको छ । एउटा वायुसेवालाई हरेक उडानमा सवा दुई लाखसम्म छुट दिने भएको हो ।
