काठमाडौं । सुन आयातमा भारी वृद्धि देखिएको छ । भन्सार विभागको तथ्यांकअनुसार चालु आर्थिक वर्षको १० महिनाको अवधिमा ३५ अर्ब ७७ करोड मूल्य बराबरको ४ हजार ६३१ किलो सुन आयात भएको हो । जुन अघिल्लो वर्षको यसै अवधिको तुलनामा ५२.५१ प्रतिशतले बढी हो । अघिल्लो वर्ष यसै अवधिमा नेपालमा २१ अर्ब २० करोड मूल्य बराबरको ३ हजार ३ किलो सुन भित्रिएको थियो ।
गत २१ चैतमा नेपाल राष्ट्र बैंकले सुन लगायतका वस्तुको एलसी खोल्न रोकेको थियो । तरपनि वैशाख दोस्रो साता वाणिज्य मन्त्रालयले राजपत्रमा सूचना निकालेर आयातमा कडाइ गर्ने वस्तुको सूची सार्वजनिक गरे पछि सुनको एलसी खुल्न थालेको थियो । हाल वाणिज्य बैंकमार्फत सरकारले दैनिक १० किलो सुन आयातको कोटा तोकेको छ ।
