काठमाडौं । नेपाल बैंक लिमिटेडले निक्षेप संकलन तथा कर्जा विस्तामा उच्च वृद्धि गरेको छ । वैशाखमा २७ वटा वाणिज्य बैंकमध्ये निक्षेप संकलन तथा कर्जा प्रवाहमा उच्च वृद्धि गरेको हो । साथै नेपाल बैंक पहिलो स्थानसमेत ओगट्न सफल भएको छ । बैंक २४.३५ प्रतिशतले निक्षेप वृद्धि गर्न सफल भएको छ भने कर्जा विस्तार ३१.९८ प्रतिशतले वृद्धि गर्न सफल भएको छ ।

२७ वाणिज्य बैंकहरुमध्ये १९ वटा वाणिज्य बैंकहरुको निक्षेप वृद्धि भएको छ र ८ वटा वाणिज्य बैंकहरुको निक्षेपमा भने गिरावट आएको छ । वाणिज्य बैंकहरुको औसत निक्षेप वृद्धिदर ६.२३ प्रतिशत रहेको छ । २७ वटै वाणिज्य बैंकहरुको कर्जा विस्तारमा वृद्धि भएको छ । औसतमा वाणिज्य बैंकहरुको कर्जा विस्तार १७.४३ प्रतिशतले बढेको छ । वैशाख मसान्तसम्म वाणिज्य बैंकहरुसँग कुल निक्षेप ४३ खर्ब ६९ अर्ब रुपैयाँ पुगेको छ । कुलकर्जा प्रवाह ४१ खर्ब ९१ अर्ब रुपैयाँ पुगेको छ ।