काठमाडौं । इण्डोनेसियाले पाम तेल निर्यातमा लगाएको प्रतिबन्ध हटाएको छ । इण्डोनेसियाले पाम तेल निर्यातमा लगाएको प्रतिबन्ध हटाएसँगै सोमबारबाट नेपालमा पनि पाम तेल आयात हुने भएको हो । आफ्नै मुलुकमा तेलको मूल्य उच्च भएपछि गत वैशाख दोस्रो सातादेखि इण्डोनेसियाले पाम तेल निर्यातमा रोके लगाएको थियो ।
आगामी सोमबारबाट इण्डोनेसियाको पाम तेल निर्यात खुला हुने भएको हो । इण्डोनेसियाले पाम तेलको निर्यात रोकेसँगै नेपाली बजारमा त्यसको प्रभाव परेको थियो । बिस्कुट, साबुन, चाउचाउ लगाउतका उद्योगमा कच्चा तेलको रुपमा प्रयोग हुनुका साथै नेपालमा प्रशोधन भएर ठूलो मात्रामा पाम तेल भारत निर्यात हुँदै आएको थियो ।
पाम तेलको आयात प्रभावित हुँदा ठूलो लगानीका झण्डै दुई दर्जन प्रशोधन उद्योग र रोजगारी पनि समस्यामा परेको थियो । चालु आर्थिक वर्षको चैतसम्म ३३ अर्ब ६१ करोड रुपैयाँ बराबरको २४ करोड ७८ लाख लिटर पाम कच्चा तेल नेपाल भित्रिएको तथ्याङ्कले देखाएको छ ।
