काठमाडौं । युनियन हाइड्रोपावर कम्पनीले चालु आर्थिक वर्षको तेस्रो त्रैमासको वित्तीय विवरण सार्वजनिक गरेको छ । कम्पनीले यस अवधिमा २ करोड ५५ लाख ६८ हजार रुपैयाँ नाफा आर्जन गरेको छ । जुन नाफा अघिल्लो वर्षको तुलनामा १८५.११ प्रतिशतले बढी हो ।
अघिल्लो वर्ष कम्पनीले यसै अवधिमा ८९ लाख ६७ हजार रुपैयाँ खुद नाफा आर्जन गरेको थियो । यस्तै कम्पनीले यस त्रैमासमा ६ करोड ५९ लाख रुपैयाँ आर्जन गरेको छ । अघिल्लो वर्ष भने विद्युत् बिक्रीबाट ५ करोड ४५ लाख रुपैयाँ आम्दानी गरेको थियो ।
यता कम्पनीको सञ्चालन नाफा ४ करोड १८ लाख रुपैयाँबाट बढेर ५ करोड २८ रुपैयाँ पुगेको छ । जगेडा कोषमा ५ करोड ४ लाख ७१ हजार रुपैयाँ ऋणात्मक रहेको कम्पनीको चुक्ता पुँजी ७५ करोड रुपैयाँ रहेको छ । कम्पनीको प्रतिसेयर आम्दानी ४ रुपैयाँ ५५ पैसा (बार्षिक) रहेको छ भने प्रतिसेयर नेटवर्थ ९३ रुपैयाँ २७ पैसा रहेको छ ।
